TOESPRAAK VAN HOOFLEIER PIET STRAUSS

BY HW/PV-OORHANDIGING VAN TRANSVAAL OP 22 AUGUSTUS 2009 IN DIE VOORTREKKERMONUMENT

1. Daar is al gesê dat HW of PV vir jou deure oopmaak vir studiebeurse of poste. Kan egter ook vir jou deure oopmaak by ‘n toekomstige skoonpa of skoonma. My eie dogter se man is deur my 2 jaar gelede oor die telefoon uit Londen “aanvaar” as iemand van huweliksmateriaal net omdat hy ‘n PV is!!??

2. As jy in Die Voortrekkers HW/PV kry, voldoen jy aan die uitdrukking dat HW/PV IS GLO… die volgende eienskappe. Elke letter van IS GLO…staan vir ‘n eienskap.

3. I… staan vir dat ‘n HW/PV die ABC van Die Voortrekkers verInnerlik het. Die C is innerlik omdat jy ‘n lewende geloofsband met die Here het. Hy woon in jou deur sy Gees en jy glo in Hom met ‘n lewende geloof. Die A is Innerlik omdat jy vanuit innerlike oortuiging assosieer met die Afrikaner. Omdat jy geestelik en kultureel regtig tuis is tussen jong Afrikaners en omdat Afrikaans en die moderne Afrikaanse lied in jou leef. Die B beteken dat hierdie land met sy horisonne jou Innerlik bind. Die oop, wye vlaktes van die Vrystaat bind my en ‘n hardekoolvuurtjie onder ‘n wilde sering iewers op ‘n skemeraand in Noord-Transvaal bind jou.

4. S… staan vir dat ‘n HW/PV hom- of haarself aanvaar: Selfaanvaarding. Voortrekkers maak dit vir jou makliker omdat hulle jou met jou persoonlikheid en gawes as ABC-kind aanvaar en vir jou help om jou plek in die span te vind. Selfaanvaarding kom makliker as jy besef dat God en jou maats jou as mens en as persoon aanvaar. Elke ABC-kind in Die Voortrekkers is belangrik, daar is geen klasseverskille nie. Dr NJ van der Merwe, ons eerste Hoofleier (1931-1940), was reeds hiervan oortuig.

5 G… staan vir Groepwerk as HW/PV in Die Voortrekkers. Groepwerk is die kern van die manier waarop Die Voortrekkers werk. Die nuwe Nasionale Jeugraad is so ‘n groep. Elkeen se sterk punte word raakgesien en gebruik in die groep. Hulle vul mekaar aan, werk saam en elkeen neem leiding as hy of sy op daardie gebied kennis het. Intussen bind die ABC as waardestelsel hulle innerlik saam. Dit vorm die fondament waarop hulle werk. So vind Verkenners uit 15 verskillende kommando’s mekaar op die eerste aand op Kalahari Vasbyt in Meimaand in die Noord-Kaap. Hulle het mekaar se name nie geken nie, maar het mekaar onmiddellik as ABC-jeug herken.

6 L… staan vir elke HW/PV is ‘n erkende Leier in Die Voortrekkers. Natuurlik kry jy onder die HW/PV’s eerste en tweede linie-leiers. Ons kan nie almal gelyk leiers wees in die groot groep nie. Die Voortrekkers gee egter aan elkeen talle geleenthede om leiding te neem en dit te oefen. Jy kry erkenning daarvoor deur take wat jy ontvang.

7 O… staan vir Ondersoek en Oplossing. Voortrekkers is gewoond aan situasies waarin hulle probleme kry om op te los. Hulle is anders as ander kinders wat in so ‘n geval maklik boedel oorgee of platval. Hulle kan sonder klagtes en verwyte self oplossings vind. So kan Voortrekkers hulle self vir ‘n hele aand vermaak as hulle self inisiatief moet gebruik.

‘n Moderne HW/PV IS GLO… ‘n ABC-vasbyter wat voluit lewe. Daarom laat ek julle met die slagspreuk wat ek op Transvaalse selfbehoud-

kampe geleer het:

Uithou, aanhou, koershou!!!