Die gedragskode vir 'n Volwasse lid van Die Voortrekkers

Elke volwasse lid van Die Voortrekkers aanvaar die volgende riglyne vir sy optrede omdat sy lewens­wyse ook 'n leerboek vir die leier van môre is:

a)   Om getrou te wees aan die missie, visie, grondslag, wese, doelstellings, offisiers­

       belofte, van Die Voortrekkers, om dit my eie te maak en dit te bevorder.

b)   Om 'n Bybels-Christelike lewens- en wêreldbeskouing te handhaaf.

c)   Om te weet dat dit in Die Voortrekkers om die jeuglid gaan, dat sy behoeftes en

      omstandighede bepalend moet wees en dat my positiewe siening van 'n kind 'n

      vormende invloed op die jeuglid sal hê.

d)   Om lojaliteit en respek te betoon teenoor alle lede van Die Voortrekkers en my

      amp of posisie te beklee in 'n gees van hulpvaardigheid en welwillendheid.

e)    Om te alle tye sober en onberispelik op te tree en my nie skuldig te maak aan

       misbruik (of die indruk van misbruik te laat) van enige aard nie.

f)    Om my daarvan te weerhou om uitsprake oor dogmatiese of partypolitieke aan­

       geleenthede te maak.

g)    Om positief op te tree in die uitvoering van dissipline en niemand hardhandig,

       vernederend of verkleinerend te behandel nie.

h)   Om bereid te wees om op 'n gereelde basis opleiding en verrykingsgeleenthede

      by te woon.

i)   Om 'n ambassadeur vir Die Voortrekkers te wees en die beeld daarvan te bevorder.

j)   Om pro-aktief te wees in my beplanning, regverdig in my oordeel en positief in my

     siening en nie myself of my span ten koste van ander te bevoordeel nie.

k)   Om kreatief en inisiërend te dink en te doen en om nie die weg van minste ongerief

      te volg nie.

l)    Om betyds kennis te gee indien ek 'n verantwoordelikheid nie kan nakom nie en om

      goed voorbereid, entoesiasties en stiptelik te wees in die nakoming van my pligte.